This page is referenced by:

• 1 2017-06-12T15:14:25-04:00 Cotch Donkey 3 Poem by Claude McKay. From "Constab Ballads" (1912); Daily Gleaner (October 1911) plain 2017-07-18T17:58:59-04:00
  
  Ko how de jackass  
     Lay do'n in de road;
  An' him ondly car'
     Little bit o' load.
  
  Kue, jackass, git up!
     'Tan' up 'pon you' foot
  Dis ya load no load,
     You's a lazy brut'.
   
  Me no know wha' mek
     Pa won' swop you too;
  For dere's not a t'ing
     Wut while you can do.
   
  Ef you car' no load,
     It is all de same;
  Hamper on or no,
     'Tis de ushal game.
  
  Póliceman a come
     Fe go mek a row,
  All because o' you
     Wid you' wutless now.
  
  "See ya, Sah, no min',
     Dis a fe me luck;
  De jackass is bad,
     Him no wan' fe wuk.
  
  "'Tek de hamper off?'
     Him no hab no cut :
  Me deh tell you say
     De jackass no wut.
   
  "Lard! me Gahd o' me!
     Him got one lee 'cratch :
  Dat is not'in', Sah,
     For him always cotch.
  
  Do, Sah, let me off,
     Ef fe te-day one;
  For a no de 'cratch
     Cause him fe lay do'n."
  
  Now because o' you
     Dem gone bring me up; 
  An' wha' hu't me mos',
     You caan' wuk a tup.
  
  Ef dem summons me,
     Mek me pay few mac,
  Dat caan' mek me 'top
     Wuk you wid sore back.